മംഗളൂരു-തിരുവനന്തപുരം വന്ദേഭാരത് ട്രെയിനിന് ഇനി 20 കോച്ചുകൾ; പ്രഖ്യാപിച്ച് റെയിൽവേ.

ന്യൂഡൽഹി: യാത്രക്കാരുടെ എണ്ണം കണക്കിലെടുത്ത് മംഗളൂരു സെൻട്രൽ-തിരുവനന്തപുരം വന്ദേഭാരത് ട്രെയിനിന്റെ (ട്രെയിൻ നമ്പർ 20631/32) കോച്ചുകൾ വർധിപ്പിച്ചതായി റെയിൽവേ അറിയിച്ചു. 16 കോച്ചുകളിൽ നിന്ന് 20 ആയിട്ടാണ് വർധനവ്.

രാജ്യത്തെ ഏഴുറൂട്ടുകളിൽ വന്ദേഭാരത് ട്രെയിനുകളിലെ കോച്ചുകളുടെ എണ്ണം റെയിൽവേ വർധിപ്പിക്കുമെന്ന് റിപ്പോർട്ടുകൾ പുറത്തുവന്നിരുന്നു. ഇതിന് പിന്നാലെയാണ് റെയില്‍വേ ഔദ്യോഗിക പ്രഖ്യാപനം നടത്തിയത്.

മംഗളൂരു സെൻട്രൽ-തിരുവനന്തപുരം വന്ദേഭാരത് ട്രെയിനിന് പുറമേ സെക്കന്തരാബാദ്-തിരുപ്പതി, ചെന്നൈ എഗ്‍മോർ-തിരുനെൽവേലി, മധുര-ബെംഗളൂരു കന്റോൺമെന്റ്, ദേവ്ഘർ-വാരാണസി, ഹൗറ-റൂർക്കേല, ഇന്ദോർ-നാഗ്പുർ എന്നീ റൂട്ടുകളിലാണ് കോച്ചുകളുടെ എണ്ണം കൂടുക.